ليه الأم الشريرة تكسب؟

من فتره طلع كتاب اسمه: Mean Moms Rule: Why doing the hard stuff now creates good kids later?!

الكتاب دا  للأمهات عشان يربوا ولادهم صح, دينيز سكيباني مؤلفة الكتاب بتأكدلك إنهم هيقعدوا يقولوا عليكي “أم شريرة ابنك مقطع نفسه من العياط و انتي و لا همك” .الكتاب بقى بيقولك إن القواعد اللي بتحطيها لولادك و معارضتك لطلباتهم اللي مش صح, بيطلع في المستقبل ولاد كويسين. يعني من الأخر بتقولك  متدلعيش ولادك.

أى أم لازم تحط  نظام و قواعد و تكون شديدة في تنفيذها, دا فى أوقات كتير بيكون أحسن من الدلع و الموافقة علي كل طلبات الأطفال, اللي بتبوظهم و تخليهم مش قادرين علي مواجهة الحياة بصعوبتها ومشاكلها. الأم الشريرة بتقدر تقول لأ لما ولادها بيطلبوا أكل مش صحي الأم الشريرة بتعرف تطبق القواعد اللي بتحطها و تعاقبهم علي السلوك الغلط, و بتقدر تعمل دا باستمرار مش مرة آه و عشرة لأ, و دي من أساسيات التربية السليمة, إن مبادئ الأم تكون واحدة و تستمر عليها… بس الأم الكيوت بقى اللي بتقول أوكي أول ما طفلها يعيط أو بتتحرج لما ابنها بيعمل مشهد عياط في مكان عام

هتقولك بقى علي 5 نصائح عشان تسيطري و تربي ولادك صح : 

1- متضعفيش قدام عياط طفلك و تعمليله اللي هو عاوزه بعد العياط عشان لو عملتي كدة مش هيطلب حاجة بعد كدة غير بالعياط, فقوليله لأ و انتي مطمنة و اوعي تتراجعي لو زودها في العياط خليكي علي موقفك.

2- اعملي نظام و قواعد معينة في بيتك و تكوني حريصة إن محدش من أفراد البيت يخالف أو ميمشيش علي القواعد دي و يكونوا عارفين إن اللي هيخالف القواعد هيتعرض لعقاب معين, و بتساعدك سكيباني بشوية وسائل للعقاب زي إنك تحرمي الطفل من حاجة هو بيحبها أو تسيبيه في أوضة لوحده لمدة معينة من الوقت و أوعي متنفذيش العقاب اللي انتي محدداه عشان ميكررش نفس الغلط تاني أو يستهون بالعقاب.

3- متصرخيش في ولادك و تكوني عارفة إن دا مبيفدش بحاجة, و دايما تكوني فاكرة إنك أم طيبة و إن ولادك عايزين يشوفوكي كدة, فحاولي دايما تقوليلهم كل التعلميات و انتي مبتسمة عشان تحسسيهم ان التعليمات دي لصالحهم مش لعقابهم….هي مهمة صعبة بس حاولي دايما تكوني صبورة و مبتسمة.

4- هتفشلي في أوقات, بس متقلقيش من مرات الفشل ولا تقعدي تفكري فيها كتير عشان دا بيسبب احباط و ممكن ميوصلكيش للي إنتيعيزاه في تربية اولادك, و متفقديش ثقتك في نفسك و انك قادرة تسيطري عليهم, بالذات لو جوزك بيغيب لفترات طويلة… افتكري دايما انتي أم قوية مش أم شريرة.

5- اهتمي بنفسك و بجمالك و ثقافتك و شغلك متوقفيش حياتك لمجرد إن عندك أطفال , اهتمامك المبالغ فيه بأولادك و انك تفني حياتك كلها عشانهم هيخليكي مش قادرة تديهم حاجة  قدام و تفضلي حاسة إن  العمر خلص في تربية الأولاد من غير متضيفي حاجة لنفسك, و ممكن يخلق طفل أناني أو مغرور بيفكر في متطلباته و مصلحته بس.

هتلاحظي إن ولادك نجحوا في تكوين شخصيتهم القوية والمستقلة اللي يقدروا يواجهوا بيها صعوبات الحياة، اللي هيواجهوها كدة كدة مهما حاولنا نشلها عنهم، فاحصدي ثمرة نجاحك بأولاد قادرين علي حل مشاكلهم من غير مساعدة من حد، ساعتها بس هيعرفوا ان امهم مكنتش أم شريرة و إنها  أم طيبة و ناجحة و ذكية.