الدجال اعظم فتنة هيشهدها الناس الفتنة الي الرسول حذر وانذر منها كتييييير وخاف علينا منها ومفيش نبي من الانبياء الا انذر قومه من الدجال سيدنا ابراهيم وموسى وعيسى وشعيب وصالح ... (عليهم السلام ) كلهم انذروا اقوامهم منه .. طيب في حد هيسال هل الدجال ذكر في القران ؟ اشير اليه في القران في اية ( .......... يَوْمَ يَأْتِي بَعْضُ آيَاتِ رَبِّكَ لَا يَنفَعُ نَفْسًا إِيمَانُهَا لَمْ تَكُنْ آمَنَتْ مِن قَبْلُ أَوْ كَسَبَتْ فِي إِيمَانِهَا خَيْرًا ۗ قُلِ انتَظِرُوا إِنَّا مُنتَظِرُونَ) سورة الانعام اية (158 ) فقال الرسول ( (ثلاث اذا خرجن لم ينفع نفس ايمانها لم تكن امنت من قبل وذكر منها الدجال ) .... تاني حاجة ربنا اتكلم في ايات عن نزول سيدنا عيسى وبما انه ذكر نزول سيدنا عيسى عليه السلام بالتالي ده يشمل ذكر الدجال قال تعالى ( وَإِن مِّنْ أَهْلِ الْكِتَابِ إِلَّا لَيُؤْمِنَنَّ بِهِ قَبْلَ مَوْتِهِ ۖ وَيَوْمَ الْقِيَامَةِ يَكُونُ عَلَيْهِمْ شَهِيدًا ) سورة النساء اية (159) فده اشارة لذكر الدجال ...
المسيح الدجال رجل من بني ادم بشر زينا ... قصيرافحج يعني مشيته فيها عيب عشان رجليه بعيدة عن بعض .. جسمه ضخم وراسه ضخمة .. وشعره كثييف وجعد مش ناعم .. عينيه الاتنين فيها عيب عينه اليمين عوراء وشبها الرسول وكانها عنبة طافية والشمال عليها جلدة .. ابيض وجبهته واسعة .. شكله وحش اوووي اعوذ بالله ... مكتوب بين عينه (ك ف ر ) او (كافر) يقراها كل مؤمن سواء بيعرف يقرا ويكتب او امي مبيعرفش .... ربنا تبارك وتعالى هيوفق المؤمن بايمانه عشان يعرف يقرا الكلمة دي ... الله على الايماااان يارب املا قلوبنا بالايمان .. عقيم لا ولد له ,, طيب ليه اسمه المسيح الدجال ؟؟ اتسمى بالمسيح لان عينه ممسوحة وقيل لانه بيسمح الارض يعني بيلف الارض .. واتسمى الدجال من الدجل وهو الكذب عشان هيكتر منه الكدب والتدلييس والخلط ..
طب انا سمعت ان الدجال هو ابن صياد ... مين ابن صياد ده ؟؟ وهل فعلا هو الدجال ؟؟
ده غلام كان موجود في عهد النبي في المدينة و اسمه صاف ومعروف بابن صياد المهم الرسول شك ان هو الدجال من صفات كانت فيه فمرة كان الغلام ده بيلعب وكان داخل على سن البلوغ 15 سنة فقرب منه النبي صلى الله عليه وسلم وكان معاه سيدنا عمر رضي الله عنه فساله النبي .. قاله اتشهد اني رسول الله ؟ فرد ابن صياد وقاله "اشهد انك رسول الاميين ".. فسكت النبي فسال ابن صياد بقى النبي قاله اتشهد اني رسول الله ؟ فرد الرسول وقاله "امنت بالله ورسله " .. فحب النبي يختبر هل الصياد وهو صغير كده ده بيستعين بالجن وبيقلوله على حاجات ؟؟ فقاله " يا ابن صياد قد خبات لك خبيئا " ( خبيت عنك كلمة ... ايه هي ؟ خمنها يا ابن صياد ) .... فقال ابن صياد " الدخ " .. فالنبي قاله " اخسأ فلن تعدو قدرك " يعني قدرك انك كاهن كداب بتستعمل الجن والشعوذة ده اخرك .. فتسال النبي بعد كده ايه هي الكلمة يارسول الله ؟ فقال النبي انزلت عليا سورة الدخان .. فالشياطين قالت لابن صياد جزء من الكلمة الي سمعوها من الملائكة او سمعوها كلها وكل شيطان وهو بينقل لشيطان غيره نقص من الكلمة لغاية ما وصلت لابن صياد ناقصة ... ففضل النبي بيفكر وشاكك بردو هل ده الدجال ؟؟ فقاله عمر رضي الله عنه " ااذن لي ان اضرب عنقه " خليني اقتله ولد زي ده عنده جن وبيستعملهم وبيقول خزعبلات وشعوذة خليني اقتله ... فرد النبي عليه وقاله " ان يكن هو فلن تسلط عليه " يعني اذا ابن صياد ده الدجال فمش هتقدر تقتله ياعمر لان ربنا كتب وقدر ان سيدنا عيسى عليه السلام هو الي هيقتله .. " وان لا يكن هو فلا خير لك في قتله " ملكش حاجة في انك تقتله ....... وفي يوم تاني راح له النبي يمكن يعرف المرة دي هو الدجال ولا لا .. فبدا النبي يتخبى ورا النخل ويقرب منه فلقى ابن صياد نايم على جنبه وعمال يتهته بكلام مش واضح فقرب النبي اكتر واكتر هو وصاحبيه سيدنا عمر وابوبكر رضي الله عنهما فلفت ام صياد وقالت يا صاف يا صاف هذا محمد جاءك .. فقال النبي "لو تركته بين " يعني لو بس كانت امه سبته ومندتش عليه كنا سمعنا هو بيقول ايه وعرفنا هل هو الدجال ولا ... وفي مرة تاني ساله النبي ماترى يا ابن صياد ؟ فقال" ارى عرشا على الماء" فقال النبي "ذاك عرش ابليس " ....عرف ابن صياد ده لانه كان مشعوذ وكاهن الجن والشياطين كانوا بيوحو له بحاجات ... مات النبي صلى الله عليه وسلم وفضل الصحابة متحيرين في ابن صياد وكان لبعضهم قصص معاه بس في النهاية محدش عرف هو الدجال ولا لا ... والصحيح عن اقوال اهل العلم ان ابن صياد مش المسيح الدجال بس هو كاهن وعنده شياطين وليه في الشعوذة والحاجات دي وقالوا انه في نهاية حياته ممكن يكون تاب وحاله اتصلح من القصص الي حصلت بينه وبين الصحابة فالله اعلى واعلم
تعليقات
إرسال تعليق